Drogba sér eftir ummælum sínum

Didier Drogba segist sjá eftir ummælum sem hann lét hafa eftir sér í frönskum fjölmiðlum á dögunum þegar hann sagðist vilja fara frá Chelsea.

Drogba sagði að hann hefði vilja fara frá Chelsea allar götur síðan hann gekk í raðir félagsins og bætti við að hann vildi fara frá félaginu næsta sumar. Hann nefndi nokkur af stóru liðunum á meginlandinu sem líklegustu liðin fyrir sig - lið eins og Barcelona, Real Madrid og AC Milan. Hann virðist nú sjá eftir ummælum sínum.

"Þegar ég lít til baka, sé ég eftir að hafa sagt það sem ég sagði í viðtalinu. Ég er Chelsea-maður og legg mig allan fram við að hjálpa liðinu. Ég styð stjórann, leikmennina og stuðningsmennina og ætla ekkert að ræða mín mál frekar fyrr en ég er búinn að funda með félaginu næsta sumar," sagði Drogba á heimasíðu Chelsea.