Drogba: Ég vil hætta hjá Chelsea

Didier Drogba segist harðákveðinn í því að fara frá Chelsea í kjölfar þess að Jose Mourinho hætti hjá félaginu.

Þetta hefur tímaritið France Football eftir honum í nýjasta hefti sínu sem kemur út á morgun. Þar segir Drogba að liðið sé í molum eftir að Mourinho hætti.

„Ég vil fara frá Chelsea. Það er eitthvað brotið hjá félaginu. Skaðinn í búningsklefanum er mikill því við vitum nú hvað varð til þess að Mourinho fór. Ekkert getur komið í veg fyrir það að ég fari upp úr þessu,“ sagði Drogba.

Hann greindi einnig frá því að hann hefur áður viljað fara frá Chelsea, allt frá því að hann gekk til liðs við félagið í júlí 2004.

„Síðan ég kom til félagsins vildi ég fara frá Chelsea og svo aftur um hvert sumar eftir það. Ég veit að Ronaldinho og Kaka eru orðaðir við félagið en það myndu engu breyta fyrir mig.“