McLeish enn bjartsýnn

Alex McLeish, landsliðsþjálfari Skota, var bjartsýnn á framhaldið þrátt fyrir sárt 2-0 tap Skota í Georgíu í gær.

Hefðu Skotar unnið í gær hefðu þeim nægt jafntefli við Ítali á heimavelli í lokaleik sínum í riðlinum. Nú þurfa þeir hins vegar að vinna leikinn gegn Ítölum til að tryggja sér sæti í úrslitakeppni EM á næsta ári.

„Ég held að enginn hafi búist við því fyrir keppnina að við yrðum í þessari stöðu fyrir lokaleikinn í riðlinum,“ sagði McLeish eftir leikinn.

Georgía tefldi fram óreyndu liði sem innihélt þrjá táninga þar sem margir af lykilmönnum liðsins voru frá.

„Ég held að þjálfari þeirra hafi ekki tekið neina áhættu í sínu landsliðsvali. Hann átti bara engan betri kost. Það fær enginn auðveldan leik í Georgíu og það verður að viðurkennast að þeir spiluðu vel.“