Know stýrir Bolton þar til annað kemur í ljós

Enska úrvalsdeildarfélagið Bolton tilkynnti í morgun að hinn sextugi Archie Knox taki við knattspyrnustjórn liðsins „þar til annað kemur í ljós".

Knox tekur við starfinu af Sammy Lee sem hætti hjá félaginu í vikunni eftir aðeins sex mánuði í starfi. Bolton er í næstneðsta sæti deildarinnar og mætir Arsenal á laugardaginn.

Þjálfararnir Ricky Sbragia og Jimmy Phillips verða Knox innan handar en Knox hefur starfað hjá Bolton síðan hann hætti sem þjálfari U-21 landsliðs Skota í ágúst síðastliðnum.

Knox var aðstoðarmaður Alex Ferguson hjá Manchester United árin 1986-1991 og hefur hann einnig starfað sem slíkur hjá Glasgow Rangers og Everton.

Á orðalagi tilkynningar Bolton er ljóst að Knox stýrir liðinu aðeins tímabundið. Talið er líklegast að annað hvort Paul Jewell eða Chris Coleman taki við liðinu. Gary Megson, Graeme Souness, John Collins og Steve Bruce hafa einnig verið orðaðir við stjórastöðuna hjá Bolton.