Newcastle ekki skylt til að selja Owen

Chris Mort, stjórnarformaður Newcastle, segir að búið sé að fjarlægja klásúlu úr samningi Michael Owen sem heimili honum að fara til annars liðs sé ákveðin upphæð boðin í hann.

„Það var klásúla í samningi hans sem hemilaði honum að fara til annars liðs fyrir ákveðna upphæð en þessi klásúla er ekki lengur til," sagði Mort.

Owen gekk til liðs við Newcastle frá Real Madrid í ágúst árið 2005 en hefur lítið getað spilað með liðinu vegna þrálátra meiðsla. Hann á enn tvö ár eftir af samningi sínum við Newcastle.

Sam Allardyce, stjóri Newcastle, segir að það sé ekki orðið tímabært að ræða nýjan samning. „Ég myndi vilja sjá hann spila tuttugu leiki fyrir okkur og þá hefja viðræður um nýjan samning. Það mikilvægasta í þessu er að hann verði leikfær í hverri viku."