Ferguson: Asnalegt að spila æfingaleik í mars

Í gær tilkynnti enska knattspyrnusambandið að það fyrirhugaði að koma á vináttuleik við Frakka þann 26. mars í vor, en það er sérstakur landsleikjadagur hjá FIFA sem notaður verður til æfingaleikja. Ferguson segir þetta asnalega dagsetningu.

Lið hans Manchester United á þannig stórleik gegn Liverpool nokkrum dögum áður og ef liðið kemst áfram í Meistaradeildinni gæti það verið að spila í fjórðungsúrslitum á þessu tímabili líka. Ferguson er ekki hrifinn af því að verið sé að klína landsleikjum inn í töfluna á svona mikilvægu tímabili hjá félagsliðunum.

"Það er asnaleg vináttuleikjavika hjá landsliðunum í mars, en ég er viss um að þar verður mjög takmarkað framboð á leikjum vegna þess hve gríðarlega mikilvægur tími þetta er hjá landsliðinum;" sagði Ferguson.

Fastlega má reikna með því að stóru félagsliðinu muni neita að hleypa lykilleikmönnum sínum í landsleiki á þessum tíma. Ferguson hlakkar til þess þegar landsleikjunum í nóvember lýkur því þá fari í hönd tími þar sem félagsliðin geti loks miðað að því að ná stöðugleika fram á vorið.

"Þegar næstu landsleikjahrinu lýkur mun það hjálpa upp á stöðugleika okkar. Flest lið, og ekki bara Manchester United, eru í miklum erfiðleikum þegar þau missa svona marga af leikmönnum sínum í hálfan mánuð í senn vegna landsleikjanna. Þetta er auðvitað mjög mikilvægur tími fyrir landsliðin líka og því verður maður að sýna þessu skilning, en kosturinn við þetta hefur venjulega verið sá að maður hefur haft frið fyrir landsleikjahléum frá nóvember og fram á vorið," sagði Ferguson.