Tevez vill ljúka ferlinum hjá Boca

Argentínumaðurinn Carlos Tevez segir að hann vilji gjarnan snúa aftur til heimalandsins og spila aftur með Boca Juniors áður en hann leggur skóna á hilluna.

Tevez gerðist fyrst atvinnumaður hjá Boca og hefur sterkar taugar til félagsins. Honum svíður því að sjá hve illa liðinu gengur um þessar mundir.

"Ég horfi á Boca leiki í sjónvarpinu alla sunnudaga þegar ég hef tök á því. Mig langar að fara aftur til Boca einn daginn og hjálpa þeim að komast á beinu brautina. Ég er stuðningsmaður Boca og mig langar að spila þar eftir 4-5 ár á meðan ég er enn góður knattspyrnumaður. Ég einbeiti mér auðvitað fyrst og fremst að Manchester United núna, en ég fylgist vel með Boca," sagði Tevez.