Arsenal þarf að greiða fyrir Merida

Arsenal þarf að greiða Barcelona rúmar 2 milljónir punda fyrir spænska ungstirnið Fran Merida eftir að niðustaða komst í málið fyrir rétti á Spáni. Barcelona vildi meina að félagið hefði átt rétt á greiðslu fyrir Merida því hann hafi verið samningsbundinn og það hefur nú verið staðfest.

Arsenal fékk Cesc Fabregas á nákvæmlega sama hátt frá Barcelona á sínum tíma og nældi í hann fyrir framan nefið á forráðamönnum Katalóníufélagsins og greiddi aðeins 700,000 pund fyrir hann fyrir fjórum árum.

Merida hefur viðurkennt að Fabregas sé fyrirmynd sín á velli enda hefur þeim verið líkt mikið saman. Spænskir dómstólar komust að því í vikunni að enska félaginu bæri að greiða Barcelona 2,2 milljónir punda fyrir Merida, sem er 17 ára gamall.

Niðurstaða dómsins setur ákveðið fordæmi og gæti orðið til þess að félagið reyndi líka að fá bætur fyrir Daniel Pancho sem fór til Liverpool í sumar.

Merida þykir gríðarlega efnilegur leikmaður og lagði m.a. upp sigurmark Spánverja í 1-0 sigri á Englendingum í leik liðanna á EM U-17 ára í vor. Hann skoraði líka sigurmark unglingaliðs Arsenal sem kom þeim í undanúrslit enska bikarsins hjá U-17 ára liðum.