Barton: Skítt með England

Miðjumaðurinn Joey Barton er ekki í vandræðum með að koma sér í fréttirnar þó hann hafi enn ekki spilað sinn fyrsta leik fyrir Newcastle. Hann tjáði skoðanir sínar á enska landsliðinu þegar hann var spurður út í mál Michael Owen félaga síns.

Ákvörðun Owen að gefa kost á sér í landsliðið hefur verið gagnrýnd nokkuð þar sem hann er nýbúinn að fara í aðgerð. Sam Allardyce stjóri Newcastle er skiljanlega ekki hrifinn af því að Owen spili með landsliðinu svo stuttu eftir aðgerðina og hafa bresku blöðin velt sér upp úr því að hugsanlega séu þeir Allardyce og Steve McClaren landsliðsþjálfari farnir að deila vegna þessa.

Joey Barton hefur sínar skoðanir á málinu, en hann hefur enn ekki spilað með Newcastle eftir að hann meiddist á undirbúningstímabilinu. Hann var áður hjá Manchester City og spilaði sinn fyrsta landsleik fyrir Englands hönd gegn Spánverjum í Febrúar.

"Það er fínt ef landsliðið vill fá mann í hópinn, en ég hef spilað einn landsleik og það er fínt fyrir mig. Ég hef meiri áhuga á því að gera vel með Newcastle. Það er auðvitað heiður að fá að spila fyrir landsliðið en mig langar miklu frekar að gera vel í deildinni hér heima," sagði Barton.