Henry: Arsenal getur unnið allar keppnir

Thierry Henry segist nú loksins vera að komast í sitt besta form eftir langa fjarveru vegna meiðsla. Hann segir að sér líði vel í Barcelona en viðurkennir að hann sakni Lundúna.

"Það var mikið áfall að meiðast svona lengi eftir að hafa alveg sloppið við meiðsli í mörg ár, en ég er að ná mínu besta núna. Ég sakna Lundúna og það er ekki auðvelt að snúa baki við borginni eftir öll þessi ár," sagði Henry, en dóttir hans býr nú í London hjá móður sinni eftir að þau hjónin skildu í sumar.

Henry segir að hann eigi enn eftir að kveðja stuðningsmenn Arsenal með formlegum hætti og vonast til að geta gert það á árinu.

"Ég vil reyna að gera það í desember þegar ég hef tíma vegna vetrarhlésins í spænska boltanum. Ég vil þá ekki fara þangað sem leikmaður heldur vil ég bara sitja í stúkunni. Ég væri ekki til í að mæta Arsenal í Meistaradeildinni því mig langar ekki að kveðja gamla liðið mitt með því að leika gegn því," sagði Henry.

Hann hefur tröllatrú á ungu liði Arsene Wenger. "Ég held að Arsenal hafi alla burði til að vinna bæði Meistaradeildina og ensku deildina. Ég sá liðið spila gegn Sevilla á dögunum þar sem það fór á kostum - og það er ekki auðvelt að spila við Sevilla. Liðið vinnur alla leiki og spilar vel bæði heima og úti - og svo spila þeir líka skemmtilegan bolta," sagði Henry.