Bruce óttast að missa starfið

Steve Bruce, knattspyrnustjóri Birmingham í ensku úrvalsdeildinni, segist óttast að missa starfið ef viðskiptajöfurinn Carson Yeung nær að klára fyrirhugaða yfirtöku sína í félaginu.

Bruce hefur stýrt Birmingham í sex ár og á 20 mánuði eftir af samningnum sem hann undirritaði í stjórnartíð David Sullivan. "Þetta lítur ekki vel út því herra Sullivan sagði að viðræður sínar við kínversku fjárfestana hafa verið neikvæðar og þá veit ég hvar ég stend," sagði Bruce.

50 milljón punda yfirtaka í félaginu hefur nú verið uppi á borðinu í þrjá mánuði og Bruce vill að málið verði leyst sem fyrst vegna þeirrar óvissu sem sveimar yfir félaginu.