Beckham er ekki klár fyrir landsliðið

David Beckham er ekki orðinn nógu góður af meiðslum sínum til að hann geti talist inni í myndinni til að spila með enska landsliðinu í undankeppni EM í þessum mánuði. Þetta segir þjálfari LA Galaxy, Frank Yallop.

Beckham er nú loksins farinn að æfa eftir að hafa meiðst á hné í lok ágúst, en þjálfari hans vill að menn fari varlega með hann. "David er ekki einu sinni búinn að spila deildarleik síðan hann náði sér af meiðslunum þannig að ég á ekki von á því að hann verði klár í landsleik. Ég er auðvitað ekki landsliðsþjálfari, en þetta er mín skoðun," sagði Yallop.