Jol: Gott að við töpuðum ekki

Martin Jol, stjóri Tottenham, var merkilega sáttur við að gera 1-1 jafntefli við Anorthosis Famagusta í síðari leik liðanna í undankeppni Evrópukeppni félagsliða í dag.

Tottenham lenti undir í leiknum þegar Fabinho kom heimamönnum yfir í upphafi síðari hálfleiks, en varamaðurinn Robbie Keane bjargaði gestunum frá háðlegu tapi. Tottenham fer því í riðlakeppnina með 7-2 sigri samanlagt, en Jol segir að hann hefði gjarnan vilja hvíla miðjumennina sína meira.

"Það eina slæma við þennan leik var að ég var með of mikið af mönnum á vellinum sem ég hefði vilja hvíla. Til dæmis hafa miðjumennirnir mínir fengið litla hvíld," sagði Jol, sem tefldi fram Kevin Prince Boateng í fyrsta skipti í dag.

"Ef maður lendir undir 1-0 vill maður laga það og við urðum að reyna að koma vel frá þessum leik. Það var gott að sjá að við næðum stigi út úr þessum leik þrátt fyrir að vera með sex eða sjö leikmenn á vellinum sem voru alls ekki að ná sér á strik. Mér er sagt að þetta lið hafi aldrei tapað á heimavelli, en það hefði samt verið óþægilegt að tapa þessu," sagði Jol.