Gylfi orðaður við þrjú neðrideildarfélög

Skysports greinir frá því í dag að þrjú lið hafi áhuga á Árbæingnum Gylfa Einarssyni.

Nottingham Forest, Hartlepool og Yeovil munu öll hafa áhuga að fá Gylfa til liðs við sig.

Hann var leystur undan samningi sínum við Leeds þann 31. ágúst síðastliðinn og getur því samið annað lið hvenær sem er.

„Gylfi er nýbúinn með sitt eigið undirbúningstímabil eftir að hafa jafnað sig á síðustu meiðslum sínum og er ekki leikfær,“ sagði Dean Sheehan, umboðsmaður Gylfa.

„Við erum þolinmóðir og munum velja það lið sem býður Gylfa upp á þær aðstæður að hann nái sér á strik á nýjan leik.“ 

Gylfi kom til Leeds frá Lilleström í Noregi í janúar 2005 en var sífellt að kljást við meiðsli á sínum tíma með félaginu. Hann spilaði aðeins 25 deildarleiki með Leeds.