Botnliðin skildu jöfn

Derby og Bolton skildu jöfn 1-1 í botnslagnum í ensku úrvalsdeildinni í dag þar sem mikið var í húfi.

Kenny Miller kom heimamönnum í Derby yfir með skoti af stuttu færi og hlóð enn meiri pressu á Litla-Sam Lee, stjóra Bolton. Gestirnir náðu þó að jafna með marki frá Nicolas Anelka og niðurstaðan jafntefli í annars nokkuð fjörugum leik.

Miller fékk tækifæri til að bæta við markareikning sinn en náði ekki að nýta það - og þeir Anelka og Christian Wilhelmsson voru einnig nálægt því að bæta við fyrir Bolton.

Liðin sitja því sem fyrr í botnsætum deildarinnar og hafa bæði hlotið aðeins fimm stig.

"Við áttum í raun skilið að vinna þennan leik. Við stýrðum leiknum í fyrri hálfleik og fengum nokkur fín færi þangað til þeir löguðu sinn leik. Ég held að við höfum svarað nokkrum spurningum um andann í liðinu eftir 5-0 tap í síðustu umferð og ég veit að við eigum eftir að valda liðum vandræðum á heimavelli," sagði Billy Davies, stjóri Derby.

"Við hefðum geta unnið þennan leik með smá heppni en ég hefði sætt mig við eitt stig fyrir þennan leik af því við vorum að berjast við lið sem er í æsilegri botnbaráttu eins og við. Fjórir leikir án taps er eitthvað til að vinna með og ég er ánægður með að liðið skuli ekki hafa brotnað eftir töpin í byrjun móts," sagði Sammy Lee, stjóri Bolton.