Vandræði Chelsea halda áfram

Didier Drogba var rekinn af velli og John Terry er líklega með brákað kinnbein eftir að Chelsea mistókst enn eina ferðina að vinna leik í ensku úrvalsdeildinni í dag. Chelsea náði aðeins 0-0 jafntefli á heimavelli gegn Fulham.

Didier Drogba var óvænt í byrjunarliði Chelsea eftir meiðsli og var rétt farinn að láta finna fyrir sér í sóknarleiknum þegar hann fékk að líta sitt annað gula spjald og var því rekinn í bað.

Salomon Kalou og Joe Cole fengu góð færi í liði Chelsea, en á sama hátt voru þeir Paul Konchesky og Diomansy Kamara ekki langt frá því að stela sigrinum fyrir gestina sem hefði klárlega fullkomnað ömurlegan dag fyrir þá bláu.

Michael Essien og John Terry urðu báðir fyrir meiðslum í leiknum og Andriy Shevchenko virkaði daufur í framlínunni. Baulað var á leikmenn Chelsea af og til allan leikinn og mátti sjá og heyra stuðningsmenn liðsins biðja um Jose Mourinho aftur.