Kyntröllið Crouch

Framherjinn leggjalangi Peter Crouch hjá Liverpool er í sviðsljósinnu á nýrri vefsíðu sem er að fara í loftið. Það er hópur aðdáenda leikmannsins sem stendur fyrir opnun síðunnar og kallar hópurinn sig Crouch Is A Sex God - eða Crouch er kyntröll. Crouch sjálfur er mjög hrifinn af þessu uppátæki.

"Ég hef aldrei verið settur í flokk kyntrölla áður. Ég væri sannarleg til í að hitta fólkið sem stendur fyrir þessu - ég er viss um að þetta er rosalega fallegt fólk," sagði Crouch í samtali við The Sun þegar hann var spurður út í síðuna.

Í viðtalinu sagðist Crouch einnig vera að undirbúa sína fyrstu ævisögu og segir hann hana verða ólíka ævisögum félaga sinna í enska landsliðinu. "Ég er ekki maður sem hefur alltaf spilað á toppnum eins og margir af hinum strákunum. Ég hef spilað fyrir Dulwich Hamlet í utandeildinni og ég hef spilað í Svíþjóð. Það er þess vegna sem ég er sennilega ánægðari með það sem ég hef en margir aðrir. Ég hef fengið að reyna að vera alveg óþekktur leikmaður."