Meiðsli Dyer ekki eins alvarleg og talið var

Læknar enska úrvalsdeildarfélagsins West Ham segja að meiðsli Kieron Dyer séu ekki eins alvarleg og óttast var í fyrstu. Dyer tvíbrákaði bein í fæti sínum í bikarleik gegn Bristol Rovers á dögunum í aðeins sínum öðrum leik fyrir félagið. Talið var víst að hann yrði frá keppni í mjög langan tíma.

"Ég fylgdist með þegar hann fór í aðgerð ásamt hinum læknunum hjá félaginu og hún heppnaðist einstaklega vel," saqgði George Cooper, yfirsjúkraþjálfari West Ham eftir aðgerðina á mánudag. "Læknarnir settu pinna og skrúfur í fótinn á honum og hann virðist ætla að gróa mjög vel, svo við erum bjartsýnir á að hann nái sér fljótt. Hann er í hvíld núna og verður á hækjum í vær vikur," sagði Cooper. Hann segir að þeir Scott Parker og Freddie Ljungberg séu einnig á ágætum batavegi.

"Parker er á viku sjö af þeim sex til átta vikum sem hann var áætlaður frá æfingum og er á réttri leið og þá er reiknað með Ljungberg til æfinga um miðja næstu viku," sagði Cooper. Parker var meiddur á hné og Ljungberg á læri.