Ensk knattspyrna er í bráðri hættu

Sir Trevor Brooking segir að straumur erlendra leikmanna inn í ensku úrvalsdeildina sé að grafa undan framtíðarmöguleikum enska landsliðsins. Brooking fer fyrir nefnd sem stýrir knattspyrnuuppbyggingu á Englandi og segir að tilfinnanlega skorti breidd í lykilstöðum í enskri knattspyrnu.

Brooking spilaði sjálfur 47 landsleiki fyrir Englands hönd á sínum tíma og hann var áhyggjufullur í spjalli við breskja ríkissjónvarpið. "Tölfræðin sýnir að mikil ógn steðjar að enska landsliðinu og við þurfum að fara að hafa áhyggjur af því. Ég vil ekki að enska landsliðið þurfi að sætta sig við það hlutskipti eftir áratug að þurfa að gera sér að góðu að ná á stórmót," sagði Brooking.

Tölurnar sem hann vísar í eru vissulega afgerandi, en í rannsókn sem breska sjónvarpið lét gera kom í ljós að fjöldi útlendinga í ensku úrvalsdeildinni hefur margfaldast á síðustu árum. Fyrstu keppnishelgina í úrvalsdeildinni keppnistímabilið 1992-1993 voru 76% byrjunarliðsmanna í ensku liðunum heimamenn. Í fyrstu umferðinni í ár voru Englendingar hinsvegar aðeins 37% byrjunarliðsmanna.

Árið 1992 voru á sama hátt aðeins 10% leikmanna í byrjunarliðunum fyrstu helgina utan Bretlandseyja, en í umferðinni fyrir þremur vikum var sú tala komin upp í 56%. Hingað til hafa verið skoruð 118 mörk í ensku úrvalsdeildinni og þar af hafa aðeins 9 þeirra verið skoruð af aðeins þeim 7 ensku framherjum sem eru í byrjunarliðum.

"Á síðustu leiktíð voru aðeins um 40% leikmanna í byrjunarliðunum í ensku úrvalsdeildinni heimamenn og á miðað við hvað liðin hafa verið dugleg að kaupa erlenda leikmenn þyrfti ekki að koma á óvart þó enskir leikmenn yrðu fljótlega aðeins þriðjungur af byrjunarliðsmönnum. Hvar eru þá tækifærin fyrir ensku leikmennina á aldrinum 17-21 árs?

Sjáið bara heimsmeistara Ítala sem dæmi. Ég held að um 70% leikmanna þar séu heimamenn. Sömu sögu má segja um Frakka, Spánverja og Hollendinga. Þeir eru á svipuðum slóðum og Ítalirnir hvað þetta varðar. Þjóðverjarnir eru með mikið af útlendingum í sinni deild, en þó ekki nærri eins marga og við. Þetta er mikið áhyggjuefni og ég óttast að eftir 10 ár verðum við í miklu basli við að tryggja okkur sæti á stórmótum með þessu áframhaldi," sagði Brooking.