Drogba er leikmaður 2. umferðar í úrvalsdeildinni

Framherjinn frábæri Didier Drogba hjá Chelsea er leikmaður 2. umferðar ensku úrvalsdeildarinnar að mati Vísis. Drogba kom inn í lið Chelsea eftir meiðsli gegn Reading í kvöld og átti stóran þátt í sigri síns liðs, 2-1. Drogba lagði upp fyrra mark Chelsea og skoraði það síðara með glæsilegu skoti.

Didier Drogba er fæddur í Abidjan á Fílabeinsströndinni árið 1978. Hanner var ekki nema fimm ára gamall þegar hnna flutti fyrst til Frakklands. Eftir að hafa flækst á milli Fílabeinsstrandarinnar og Frakklands um nokkurra ára skeið skrifaði Drogba loks undir samning við franska 2. deildarliðið Le Mans þegar hann var nítján ára gamall. Eftir þrjú ár hjá Le Mans lá leiðin til 1. deildarliðsins Guingamp þar sem hann skoraði 17 mörk og myndaði frábært framherjapar með Florent Malouda, núverandi samherja sínum hjá Chelsea. Sumarið 2003 var hann síðan seldur til Marseille fyrir fjórar milljónir punda og þá fór ferill Drogba loksins í gang. Hann skoraði 19 mörk í deildinni og ellefu mörk í Evrópukeppnunum og var valinn leikmaður ársins í Frakklandi.

Það leiddi svo til þess að Jose Mourinho, knattspyrnustjóri Chelsea, pungaði út 24 milljónum punda fyrir Drogba sumarið 2004. Fyrstu tvö árin hjá Chelsea voru erfið en í fyrra sló hann rækilega í gegn. Drogba varð markahæstur í úrvalsdeildinni með 20 mörk og skoraði 13 mörk í öðrum keppnum. Hann var mörgum talinn vera besti framherji Evrópu í fyrra enda fáir leikmenn sem sameina styrk, hraða og knattspyrnuhæfileika á sama hátt og Drogba.

Hann sýndi í kvöld hversu mikilvægur hann er fyrir Chelsea. Eitt mark og ein stoðsending sýndu að liðið getur ekki án hans verið.

Ég er:

Nafn: Didier Drogba

Aldur: 29 ára

Félög: Le Mans (Frakklandi), Guingamp (Frakklandi), Marseille (Frakklandi) og Chelsea.

Númer: 11

Leikir/mörk í úrvalsdeildinni: 93/43

Landsleikir/mörk: 30/21