Nautgripaflutningar bannaðir vegna Gin- og klaufaveiki

Yfirvöld í Bretlandi hafa bannað allan flutning á búfénaði í kjölfar þess að gin og klaufaveiki greindist á bóndabæ nærri Guildford í Surrey fyrir utan London. Um 60 dýr reyndust smituð af sjúkdómnum, sem olli mikilli skelfingu í Bretlandi árið 2001.

Samkvæmt lögum verður öllum nautgripum á bænum slátrað og bændum um allt land er bent á að fylgjast vel með gripum sínum og tilkynna yfirvöldum það umsvifalaust ef grunur vaknar um smit.

Á bilinu 6 og hálf til tíu milljónir nautgripa voru felldir í faraldrinu árið 2001. Hann er talinn hafa kostað um átta og hálfa milljón punda.

Gordon Brown forsætisráðherra Breta snýr heim úr sumarfríi á morgun til að funda með almannavarnanefnd Bretlands um málið.

Sjúkdómurinn er töluvert hættulegri ferfætlingum en mönnum. Örfá tilfelli hafa greinst í mönnum, það síðasta árið 1966. Þó getur hann haft háalvarlegar afleiðingar fyrir landbúnað, og ferðamennsku, en árið 2001 var stórum svæðum lokað fyrir umferð til að reyna að hemja smitið.