Terry finnur sig ekki með fræga fólkinu

Ensksi landsliðsfyrirliðinn John Terry hjá Chelsea var ekki sérstaklega hrifinn af Los Angeles þegar hann dvaldi þar í nokkra daga á æfingaferðalagi. Hann segist ekki geta hugsað sér að feta í fótspor David Beckham í stjörnulífinu - né heldur Vinnie Jones ef út í það er farið.'

"Það er rosalega fínt að fara til LA í nokkra daga í frí en ég er ekki viss um að ég hefði áhuga á að vera þar til langframa. Það er fínt að koma þarna, strendurnar, búðirnar og veðrið er fínt, en ég er hræddur um að það eigi ekki við mig. Það getur vel verið að ég verði kominn á aðra skoðun síðar á ferlinum þegar boltinn verður orðinn betri þarna en ég er ekki maður sem lifir lífi fræga fólksins.

Ég er meira fyrir það að tjútta með félögunum og sýna þeim danssporin mín. Ég held að ég feti ekki í fótspor Beckham og þess síður í fótspor Vinnie Jones og fari að leika harðjaxla í kvikmyndum," sagði John Terry í samtali við News of the World um helgina.