Morientes hefur trú á Torres

Spænski framherjinn Fernando Morientes er viss um að landa sínum og nafna Fernando Torres muni takast að festa sig í sessi með Liverpool í ensku úrvalsdeildinni þó honum sjálfum hafi ekki tekist það á sínum tíma.

Rafa Benitez stjóri Liverpool batt miklar vonir við Morientes þegar hann keypti hann til Liverpool árið 2005, en Morientes skoraði aðeins 8 mörk í 40 leikjum fyrir þá rauðu og sneri að lokum aftur til Spánar þar sem hann hefur leikið með Valenica við góðan orðstír. Svipuð pressa verður á Torres að standa sig hjá Liverpool, en Morientes hefur ekki áhyggjur af landa sínum.

"Torres hefur það sem til þarf til að standa sig á toppnum á Englandi - ekki spurning," sagði Morientes í samtali við Sunday Mirror. "Hann er frábær leikmaður og á bjarta framtíð fyrir sér. Það besta við Torres er það að þó hann sé ungur að árum, hefur hann gríðarlega reynslu. Ég held að það að fara til Liverpool hafi verið skref í rétta átt fyrir hann og ég veit að hann á eftir að smella inn í liðið. Hann er fljótur og kraftmikill og hann á eftir að finna sig betur á Englandi en ég gerði," sagði Morientes.