Wilhelmsson orðaður við Bolton

Sænskir fjölmiðlar greina frá því í dag að enska úrvalsdeildarfélagið Bolton sé nú líklegast til að landa útherjanum Christian Wilhelmsson frá Nantes í Frakklandi. Landsliðsmaðurinn sænski náði sér aldrei á strik í Frakklandi en átti ágæta leiktíð sem lánsmaður með Roma á síðasta tímabili.

"Wilhelmsson hefur vakið áhuga fjölda liða og eitt af þeim félögum er Bolton," sagði umboðsmaður hans í samtali við Expressen í Svíþjóð. "Ég get hinsvegar ekkert tjáð mig meira um málið fyrr en samningar nást við Nantes."