Íslensk flugfélög á flugsýningunni í París

Íslenskir flugrekendur eiga fulltrúa sína á flugsýningunni í París sem hófst í gær og stendur út vikuna. Þar er um að ræða fulltrúa frá Icelandair Group, Avion Aircraft Trading og Air Atlanta Icelandic og eru þeir í hópi um 200 þúsund annarra fulltrúa kaupenda og seljenda flugvéla sem leiða saman hesta sína.

„Um tvö þúsund sýnendur kynna hér flugvélar, stórar sem smáar, vélar fyrir venjulegt farþegaflug, hervélar og vélar sem sinna ýmsum sérverkefnum, hvers konar flugtækni. flugvélahluta og flugleiðsögukerfi má skoða hér á fjölmörgum básum," segir í tilkynningu frá samgönguráðuneytinu. „Yfir höfðum manna svífa svo með mismiklum gauragangi vélar sem sýna getu sína og flugmanna sinna. Er raunar haft á orði að hér þýði lítið að tala saman uppúr hádegi því þá nái flugsýningarnar yfirhöndinni og eru það orð að sönnu því þær eru ekki allar hljóðlátar."

Í tilkynningunni er greint frá því að umræða um hávaða frá flugvélum, mengun og losun gróðurhúsalofttegunda verði æ fyrirferðarmeiri í flugheiminum og hafa sumir flugvélaframleiðendur lagt sérstaka áherslu á að kynna framfarir sínar í þessum efnum á sýningunni.

„Á sýningunni kynna jafnan stærstu framleiðendurnir nýja sölusamninga og þannig hefur Boeing greint frá sölu 40 B737-900 véla til Lion Air sem er með höfuðstöðvar í Jakarta og Airbus heldur blaðamannafund í dag þar sem búast má við að greint verði frá stöðunni á sölu Airbus A380 risaþotunnar sem hér hefur mátt sjá bæði á jörðu niðri og á lofti." Þegar hefur verið tilkynnt um miklar pantanir í A350 breiðþotuna sem keppir við B787 Dreamliner en ljóst verður eftir sýninguna hvernig essir tveir framleiðendur standa í keppninni um hylli kaupenda að því er tíðindamaður samgönguráðuneytisins segir.