Sarkozy næsti forseti Frakklands

Kjörsókn var 85,5 prósent, og hefur ekki verið meiri í áratugi.

Sarkozy, sem er 52ja ára menntaður lögfræðingur, tekur við af Jacques Chirac sem hefur gegnt embættinu í tólf ár. Hann er afar umdeildur, ekki síst fyrir harða afstöðu gegn innflytjendum. Frægt var þegar hann kallaði unglinga úr fátækum úthverfum Parísar ,,múg". Þau ummæli, sem hann lét falla fyrir óeirðirnar í úthverfum Parísar 2005, urðu þess valdandi að margir vildu setja hann í sama flokk og öfga hægrimanninn Jean-Marie Le Pen

Hann var borgarstjóri í efnuðu úthverfi parísar, Neuilly, á milli 1983 og 2002, þegar hann varð innanríkisráðherra. Hann gegndi einnig stöðu fjármálaráðherra um hríð árið 2004.

Hann þykir vinnusamur og metnaðargjarn og hefur verið lýst sem ofvirkum.

Honum sinnaðist við fyrrverandi bandamann sinn, Jaques Chirac fráfarandi forseta, þegar hann studdi mótframbjóðanda hans í forsetakosningunum 1995.

Þá þykir hann vinsamari við Bandaríkin en forveri hans, þó hann hafi verið mótfallinn stríðinu í Írak.