Ferguson hrósar ótrúlegri endurkomu Alan Smith

Sir Alex Ferguson, stjóri Manchester United, segir að endurkoma Alan Smith í lið sitt hafi verið lyginni líkust og geti gert gæfumuninn í baráttu liðsins um sigur í ensku deildinni, ensku bikarkeppninni og Meistaradeildinni. Eftir að hafa verið frá í nánast 14 mánuði samfleytt hefur Smith spilað frábærlega á síðustu vikum.

Segja má að 7-1 sigurleikurinn gegn Roma hafa markað upphafið að formlegri endurkomu Smith í lið Man. Utd. því þá fékk hann í fyrsta sinn í langan tíma tækifæri í byrjunarliðinu – sem hann átti eftir að nýta til hins ýtrasta. Síðan þá hefur Smith spilað frábærlega í leikjum gegn Watford og Sheffield United og vilja margir meina að hann sé orðinn ómissandi í byrjunarlið Man. Utd.

“Hann hefur verið ótrúlegur,” viðurkennir Ferguson. “Fyrir utan það að hafa spilað frábærlega hefur hann komið með einhvern neista í liðið. Ferskleiki og áhugi hans smitar út frá sér til annara leikmanna og hann hefur gert liðinu gríðarlega gott. Þessi ferskleiki gæti gert gæfumuninn fyrir okkur,” segir Ferguson.