Mido íhugar að fara frá Tottenham

Framherjinn Mido hjá Tottenham segist vilja fara frá félaginu ef hann fái ekki að spila meira en verið hefur í vetur. Mido er sem stendur fjórði framherjinn í goggunarröð þjálfarans Martin Jol á eftir þeim Dimitar Berbatov, Robbie Keane og Jermain Defoe.

Mido lék vel með Tottenham á síðustu leiktíð en hefur ekki verið í góðu formi í vetur, auk þess að eiga við þrálát meiðsli að stríða. Litlu munaði að hann færi til Manchester City í janúar, en Jol fékk hann af því á síðustu stundu.

"Ég mun ræða við stjórann eftir að leiktíðinni lýkur og ef ég sé ekki fram á að vera inni í myndinni hér mun ég líklega snúa mér annað. Ég fékk fínt tilboð frá Manchester City á sínum tíma og þá hafa Celta Vigo og PSV einnig boðið mér að koma," sagði Egyptinn.