Mohammed viðurkennir að hafa skipulagt árásirnar 11. september

Khalid Sheikh Mohammed, al-Qaida liði sem er í haldi Bandaríkjamanna í fangabúðunum við Guantánamo-flóa, viðurkenndi við yfirheyrslur í búðunum að hafa staðið á bak við árásirnar í Bandaríkjunum 11. september 2001.

Í handriti af yfirheyrslum af Mohammed sem bandaríska varnarmálaráðuneytið sendi frá sér í dag viðurkennir Mohammed að bera ábyrgð á árásunum frá A til Ö og sömuleiðis að hafa skipulagt fleiri árásir á vegum al-Qaida. Mohammed hefur lengi verið talinn höfuðpaurinn á bak við árásirnar 11. september en nýlega hófust réttarhöld yfir honum í Guantánamo-búðunum. Hann var handtekinn í Pakistan fyrir rúmum fjórum árum.