Tsvangirai verði leiddur fyrir rétt

Hæstiréttur í Simbabve hefur krafist þess að annaðhvort verði Morgan Tsvangirai leiðtogi stjórnarandstöðunnar leiddur fyrir rétt eða hann látinn laus. Tsvangirai var handtekinn á sunnudag þegar óeirðalögregla leysti upp útifund í Harare, höfuðborg Simbabve.

Lögmaður hans hefur haldið því fram að hann hafi verið beittur ofbeldi í varðhaldi. Þá segir lögmaðurinn að honum hafi verið meinað að hitta skjólstæðing sinn, þrátt fyrir dómsúrskurð þar um. Tsvangirai er leiðtogi stærsta stjórnarandstöðuflokks landsins og hefur verið helsti andstæðingur Roberts Mugabe forseta sem hefur meðal annars bannað flokki hans að taka þátt í kosningum í landinu.

Dómari í hæstarétti fyrirskipaði einnig að Tsvangirai ætti þegar að fá læknisaðstoð, þyrfti hann á henni að halda og leiddur fyrir rétt strax í dag ellegar látinn laus. Alþjóðasamfélagið hefur fordæmt handtöku Tsvangirai og Bandaríkin kröfðust þess þegar í gær að þeir sem voru handteknir við friðsamleg og lýðræðisleg mótmæli yrðu látnir lausir.

Upplýsingamálaráðherra landsins hins vegar hélt því fram í gær að mótmælendur hefðu ráðist að lögreglumönnum með vopnum og framið skemmdarverk. Robert Mugabe hefur verið forseti Simbabve frá árinu 1980, hann er 83 ára gamall en sýnir engin merki þess að hann ætli að sleppa hörðu taki sínu af stjórn landsins.

Óánægja með stjórnarhætti hans hefur magnast undanfarin misseri, aðallega vegna gríðarlega slæms efnahagsástands en stór hluti þjóðarinnar er atvinnulaus og verðbólga hefur mælst 1700% sem er það hæsta í heiminum.