Engin örvænting í herbúðum Chelsea

Peter Kenyon, stjórnarformaður enska úrvalsdeildarfélagsins Chelsea, segir að allt sé í fínasta lagi í herbúðum félagsins og að Jose Mourinho muni gegna starfi knattspyrnustjóra út samningstímann. Þetta sagði Kenyon í drottningarviðtali við Sky-sjónvarpsstöðina í dag, eins og til að slá á þrálátan orðróm um ólgu í herbúðum félagsins.

"Það er engin ólga eða örvænting í herbúðum Chelsea og ég held að mörg félög á Englandi væru til í að vera í okkar sporum, þar sem við erum í öðru sæti deildarinnar og líklega það lið sem er í bestri aðstöðu til að vinna alla fjóra bikarana sem eru í boði.

Það ríkir einbeiting og sigurvilji í herbúðum Chelsea núna og stjórnin og þjálfarateymið er allt á sömu línu. Við viljum byggja á góðum árangri síðustu tveggja ára og allir styðja knattspyrnustjórann heilshugar. Jose Mourinho hefur enda fullan hug á að klára samning sinn við Chelsea, hann elskar félagið og hvert ætti hann annars að fara og hafa það betra en hér?" sagði Kenyon.