Ívar skoraði í sigri Reading

Ívar Ingimarsson var á skotskónum hjá Reading í kvöld þegar liðið lagði Wigan 3-2 í ensku úrvalsdeildinni. Wigan komst í 1-0 í leiknum en Ívar jafnaði með góðum skalla eins og sjá má á myndinni hér til hliðar.

Shane Long og Leroy Lita skoruðu hin mörkin fyrir Reading en þeir Emile Heskey og Denny Landzaat skoruðu mörk Wigan.

West Ham lá heima 2-1 fyrir Liverpool þar sem þeir Dirk Kuyt og Peter Crouch skoruðu mörk þeirra rauðu en nýr liðsmaður West Ham, Kepa Blanco, minnkaði muninn fyrir West Ham með sinni fyrstu snertingu þegar skammt var eftir af leiknum. Liverpool er nú aðeins tveimur stigum frá Chelsea í töflunni.

Sheffield United vann dýrmætan sigur á Fulham 2-0 þar sem Stead og Tonge gerðu út um leikinn með tveimur mörkum á fimm mínútna kafla í fyrri hálfleik. Heiðar Helguson kom inn sem varamaður fyrir Vincenzo Montella á 33. mínútu.

Portsmouth og Middlesbrough skildu jöfn 0-0.