Pearce: Ég á skilið að fá skammir

Stuart Pearce, stjóri Manchester City, segist eiga það fyllilega skilið að fá að heyra það frá stuðningsmönnum félagsins vegna lélegs gengi City í vetur. Liðið vann Middlesbrough um helgina eftir fimm töp í röð og var komið óþægilega nálægt fallsvæðinu fyrir vikið.

"Maður getur ekkert verið að kippa sér upp við það þó einhverjir séu með skítkast út í mann - það er ekki eins og ég hafi ekki átt það skilið - því við höfum alls ekki verið að spila vel og það er gríðarlega mikilvægt fyrir okkur að reyna að vinna sem flesta leiki sem eftir eru af tímabilinu," sagði Pearce.