Árleg verðbólga 3.700 prósent

Árleg verðbólga í Simbabve í Afríku var 3.700 prósent í lok apríl, sú langmesta í heiminum. Vöruverð í landinu tvöfaldaðist á milli mánaða.

Robert Mugabe, forseti Simbabve, skrifaði á mánudag undir lög um verð- og launastýringar sem ætlað er að lækka verðbólguna. Þeir sem brjóta reglurnar þurfa að sitja í fangelsi í allt að fimm ár.

Atvinnuleysi í landinu er nú um 80 prósent, og hefur aldrei verið hærra. Spillingu og slæmri stjórnun er kennt um þetta versta efnahagsástand landsins síðan það fékk sjálfstæði árið 1980.