Robinson og Beckham settir út

Steve McClaren landsliðsþjálfari Englendinga ætlar að gera tvær áhugaverðar breytingar á liði sínu þegar það mætir Króötum í mikilvægum lokaleik sínum í undankeppni EM í kvöld.

Breskir fjölmiðlar fullyrða þannig að þeir David Beckham og Paul Robinson verði ekki í byrjunarliðinu eins og reiknað var með og þeirra í stað komi þeir Scott Carson og Shaun Wright-Phillips.

Gareth Barry verður líklega í liðinu og mun mynda fimm manna miðju liðsins ásamt þeim Phillips, Frank Lampard, Steven Gerrard og Joe Cole. Sagt er að Peter Crouch verði einn í framlínunni og að varnarlínan verði skipuð þeim Micah Richards, Sol Campbell, Joleon Lescott og Wayne Bridge.

Englendingum nægir stig til að tryggja sæti sitt á EM næsta sumar og stórsigur liðsins í kvöld gæti fleytt því í efsta sæti riðilsins.