Ekki fleiri pappírsmiðar

Alþjóða flugmálastofnunin, IATA, sagðist í dag hafa lagt inn sína síðustu pöntun á pappírsflugmiðum. ,,Eftir einungis 278 daga, verður pappírsmiðinn orðinn að safngrip" sagði Giovanni Bisignani, framkvæmdastjóri stofnunarinnar.

Þann 1. júní á næsta ári verða pappírsmiðarnir endanlega lagðir af. Þetta þýðir ekki einungis þægindi fyrir farþega, heldur gríðarlegan sparnað fyrir flugfélögin, en kostnaður vegna hvers pappírsmiða jafngildi 575 krónum. Þá er lífi fimmtíu þúsund trjáa sem fóru í miðana á ári hverju þyrmt, og flugfélögin losna við gagnrýni umhverfisverndarsinna vegna þess.

Flugmálastofnunin hóf að berjast fyrir notkun e-miða fyrir þremur árum, og nú er svo komið að 84% allra farþega fljúga án pappírsmiða. Að sögn stofnunarinnar stefnir í að Kína verði fyrsta landið sem er algerlega án pappírsflugmiða.

IATA eru samtök 240 flugfélaga sem saman standa fyrir 94 prósentum af alþjóðlegu áætlanaflugi. Þau flugfélög sem ekki eru meðlimir í IATA eru mestmegnis lággjaldaflugfélög á borð við Ryanair og Easyjet, sem nota ekki pappírsmiða.