Bruce fær ekki að ræða við Wigan

Forráðamenn enska úrvalsdeildarfélagsins Birmingham neituðu í dag beiðni Wigan um að fá að ræða við knattspyrnustjórann Steve Bruce með það fyrir augum að fá hann til að taka við liðinu.

Bruce er búinn að vera hjá Birmingham í næstum sex ár en óvíst er hvort hann heldur starfi sínu ef fjárfestar frá Hong Kong klára yfirtöku sína í félaginu eins og líklegt þykir á næstunni.

Wigan er án stjóra eftir að Chris Hutchins var rekinn eftir aðeins 12 leiki og í gær neitaði fyrrum stjóri liðsins, Paul Jewell, því sem hann kallaði "ótrúlegu tilboði" um að taka við gamla starfinu sínu aftur.