Enn vinnur United 1-0

Manchester United komst í dag í annað sæt ensku úrvalsdeildarinnar með því að leggja Birmingham 1-0 á útivelli. Það sama var uppi á teningnum hjá United og venjulega, lítið fór fyrir fljúgandi spilamennsku liðsins frá síðustu leiktíð en niðurstaðan engu að síður enn einn 1-0 sigurinn.

Cristiano Ronaldo skoraði sigurmark United eftir mistök Franck Quedrue en hann var þarna að spila í 100. sinn í byrjunarliði liðsins. Liðið missti markvörðinn Edwin van der Sar meiddan af velli í dag og leysti Pólverjinn Tomasz Kuszczak hann af hólmi.

Birmingham fékk sín færi í leiknum og varði Van der Sar til dæmis vel frá Cameron Jerome og þá hreinsaði Rio Ferdinand skot Gary McSheffrey á marklínu.