Everton náði í stig á Stamford Bridge

Bakfallsspyrna Tim Cahill tryggði Everton 1-1 jafntefli gegn Chelsea í viðureign liðanna á Stamford Bridge í dag eftir að Didier Drogba hafði komið heimamönnum yfir með laglegum skalla.

Gestirnir byrjuðu vel og Steven Pienaar fór illa með gott færi. Það var svo markvörðurinn Tim Howard hjá Everton sem hélt sínum mönnum inni í leiknum með stórkostlegri markvörslu eftir skot Frank Lampard. Þá fékk Didier Drogba sannkallað dauðafæri fyrir opnu marki en hitti ekki boltann.

Alex varði skot Tony Hibbert á línu en það var svo Drogba sem kom heimamönnum yfir á 70. mínútu með fallegum skalla eftir fyrirgjöf frá Salomon Kalou.

Tim Cahill var svo hetja Everton þegar hann skoraði með glæsilegri bakfallsspyrnu á 89. mínútu og tryggði Everton stig. Chelsea hafði unnið fjóra leiki í úrvalsdeildinni fyrir leikinn í dag, en gestirnir áttu skilið stig fyrir baráttu sína og fínan leik.