Hamann keyrði fullur

Þýski miðjumaðurinn Dietmar Hamann hjá Manchester City var í dag sviptur ökuréttindum sínum í hálft ár og dæmdur til að greiða á níunda þúsund pund í sekt eftir að hafa verið fundinn sekur um ölvunarakstur.

Hamann klessukeyrði Porsche-bifreið sína í október í fyrra en fékkst aldrei til að viðurkenna að hann hefði sjálfur ekið bílnum. Lögreglumenn sem stöðvuðu hann á gangi skömmu eftir óhappið spurðu hann hvort hann hefði ekið bílnum, en hann svaraði því til að hann gæti aldrei ekið svona illa.

Lögmaður Hamann vísaði því alfarið á bug að leikmaðurinn hafi verið drukkinn umrætt kvöld, því hann hafi ekki verið færður í blóðprufu og heldur ekki verið látinn blása.