Nær Newcastle 500. markinu?

Einn leikur er á dagskrá í ensku úrvalsdeildinni í knattspyrnu í kvöld þar sem Newcastle fær Tottenham í heimsókn. Gestirnir þurfa nauðsynlega á sigri að halda enda situr liðið á fallsvæðinu.

Newcastle er eitt af sjö liðum í ensku úrvalsdeildinni sem er taplaust á heimavelli, en er reyndar með lægsta stigafjölda liðanna sjö. Tottenham hefur á sama hátt ekki unnið leik á útivelli til þessa og getur aðeins státað af að hafa lagt botnlið Derby.

Tottenham hefur gert jafntefli í síðustu þremur útileikjum sínum en þó liðið sé í fjórða neðsta sæti í deildinni - hefur það skorað flest mörk allra liða fyrir utan efstu fimm. Newcastle hefur skorað fleiri mörk á móti Tottenham (46) en nokkru öðru liði frá stofnun úrvalsdeildarinnar.

Newcastle þarf að skora þrjú mörk í leiknum í kvöld til að ná 500 marka múrnum í úrvalsdeildinni og liðið hefur ekki tapað heima fyrir liði frá London í meira en ár.

Tottenham hefur ekki unnið leik í síðustu sex viðureignum og eini sigur liðsins í deildinni til þessa var 4-0 sigur á Derby. Liðið hefur fengið á sig tvö mörk að meðaltali í leik á leiktíðinni sem þýðir að liðið er með næstlélegustu vörnina í deildinni.

Leikir Tottenham hafa verið fjörlegir það sem af er og í viðureignum Tottenham til þessa hafa komið að jafnaði 3,78 mörk í leikjum liðsins. Vinni liðið sigur í kvöld verður það 75. útisigur liðsins í úrvalsdeildinni frá upphafi.