Fabregas gæti misst af næstu þremur leikjum Arsenal

Arsene Wenger, stjóri Arsenal, býst við því að Cesc Fabregas verði frá næstu tíu dagana og missi því af næstu þremur leikjum Arsenal í ensku úrvalsdeildinni.

Fabregas tognaði aftan í læri í leik Arsenal og Sevilla í Meistaradeild Evrópu í vikunni. „Ég veit ekki fyrir víst hvað Cesc verður lengi frá,“ sagði Wenger. „Það gæti verið að hann verði klár fyrir leikinn gegn Aston Villa á morgun en í versta falli verður hann frá í tíu daga. Læknarnir eru ekki bjartsýnir fyrir leikinn á morgun.“

Robin van Persie er enn frá vegna sinna meiðsla og þá eru þeir Gael Clichy og Alexandar Hleb tæpir.