Sven-Göran ver Garrido fram í rauðan dauðann

Sven-Göran Eriksson segir að hann muni verja varnarmanninn Javier Garrido fram í rauðan dauðann.

Garrido fékk vænan skammt af gagnrýni eftir leik Manchester City og Chelsea um helgina sem síðarnefnda liðið vann, 6-0.

Svo gæti farið að Michael Ball taki stöðu hans í vörn City þegar liðið mætir Bolton í enska deildabikarnum í kvöld.

Garrido verður þó örugglega með City gegn Sunderland í deildarleik á mánudaginn næstkomandi. Hann hefur átt gott tímabil, eins og aðrir leikmenn City, fyrir utan skellinn gegn Chelsea.

Eriksson sakaði sína menn um að hafa einfaldlega gefist upp gegn Chelsea. En hann er sannfærður um að frammistaðan sé ekki einkennandi fyrir Garrido.

„Hann er frábær leikmaður og mikill baráttuhundur. Hann átti erfitt uppdráttar á laugardag, sérstaklega í síðari hálfleik. Hann var þó ekki sá eini. Tíu leikmenn til viðbótar áttu einkar slæman dag.“

Eriksson sagði enn fremur að menn verði að vinna saman á vellinum. „Ef menn hjálpast ekki verða varnarmennirnir berskjaldaðir. Að benda á einn leikmann í þessu sambandi er einfaldlega rangt.“