Nikolic kjörinn þingforseti

Bandamaður Slobodans Milosevic heitins var í gær kjörinn forseti serbneska þingsins, en kjörið markar endurkomu öfgaþjóðernissinna til valda og áhrifa í landinu.

Tomislav Nikolic, einn af leiðtogum hins öfgaþjóðernissinnaða Róttæka flokks Serbíu, var kjörinn í þetta áhrifamikla embætti með fulltingi þingmanna íhaldsflokks fráfarandi forsætisráðherra, Vojislavs Kostunica. Nikolic fékk atkvæði 142 af 244 þingmönnum sem viðstaddir voru á maraþonþingfundi sem stóð yfir í nærri fimmtán tíma og lauk ekki fyrr en aðfaranótt þriðjudags. Frambjóðandi Lýðræðisflokksins, sem er hliðhollur nánari tengslum við Vesturlönd, fékk 99 atkvæði.

Með kjörinu varð Nikolic fyrsti öfgaþjóðernissinninn til að komast í hátt embætti síðan Milosevic var bolað frá völdum árið 2000 í byltingu sem mikill meirihluti almennings studdi.

Valið á Nikolic endurspeglar vaxandi áhrif þjóðernissinna í stjórnmálum landsins þegar hillir undir að Kosovo-hérað verði lýst sjálfstætt samkvæmt áætlun Sameinuðu þjóðanna. Að vestræn-sinnaðir lýðræðisflokkar landsins skyldu ekki geta komið sér saman um stjórnarmyndun frá því þingkosningar fóru fram hinn 21. janúar ýtir einnig undir þessa þróun.