Heskey vonast til að ná Króataleiknum

Framherjinn Emile Heskey hjá Wigan segist vonast til að verða búinn að ná sér af ristarbroti fyrir leik Englendinga og Króata í undankeppni EM þann 21. næsta mánaðar.

Þessi stóri og stæðilegi framherji var mjög óvænt valinn aftur í enska landsliðið fyrir leikinn gegn Rússum í síðasta mánuði og stóð sig vel. Hann ristarbrotnaði hinsvegar í leik Wigan gegn Fulham um miðjan síðasta mánuð og var tjáð að hann yrði 6-8 vikur frá keppni.

"Þegar ég fór í aðgerðina var mér sagt að þetta yrðu 6-8 vikur en maður veit aldrei. Nú styttist í að ég fari úr hlífðarstígvélinu og þá kemur betur í ljós hvað ég verð lengi frá. Kannski er ég fljótur að ná mér - maður veit aldrei með svona meiðsli," sagði Heskey.