Theódór á bekknum í borgarslag Glasgow

Theódór Elmar Bjarnason sat á varamannabekk Celtic sem tapaði fyrir grönnum sínum í Rangers í dag, 3-0.

Hann kom ekkert við sögu þótt svo að Gordon Strachan, stjóri Celtic, notaði einungis tvær skiptingar í þessum leik. Leikurinn var harður en ellefu gul spjöld litu dagsins ljós í dag. Þar af fengu leikmenn Celtic níu áminningar en þó enginn rautt spjald.

Nacho Novo kom Rangers yfir á 28. mínútu og Barry Ferguson bætti um betur á þeirri 56. Novo skoraði svo þriðja markið, úr víti, á 79. mínútu.

Með sigrinum komst Rangers upp við hlið Celtic á toppi deildarinnar en bæði lið hafa fengið 22 stig eftir tíu leiki. Hibernian getur endurheimt toppsætið með sigri á Motherwell á útivelli. Þegar þetta er skrifað hefur Motherwell hins vegar foryustu, 2-1, og stefnir því í fyrsta tap Hibs á tímabilinu.