Real sagt reiðubúið að borga 4,5 milljarða fyrir Cristiano Ronaldo

Spænskir miðlar greina frá því í morgun að Real Madrid sé reiðubúið að greiða Manchester United 50 milljónir evra, jafnvirði um 4,5 milljarða króna, fyrir portúgalska landsliðsmanninn Cristiano Ronaldo.

Ronaldo, sem er aðeins 21 árs, hefur leikið mjög vel með United í vetur og gert 13 mörk í ensku úrvalsdeildinni. Eftir því sem fram kemur á vefmiðli spænska dagblaðsins AS sjá forráðamenn konungsliðsins fyrir sér að hann geti fetað í fótspor Davids Beckham en félagið seldi tugþúsundir íþróttatreyja þegar hann gekk til liðs við Real Madrid.

Ef af kaupunum verður, verður það ekki í fyrsta sinn sem Real Madrid greiðir himinháar fjárhæðir fyrir leikmenn því Frakkinn Zinedine Zidane kom til liðsins fyrir 75 milljónir evra og Luis Figo kom frá erkifjendunum Barcelona fyrir 60 milljónir evra.