Ronaldo: Verð hjá United um ókomin ár

Cristiano Ronaldo segir í nýrri bók sem kemur út í vikunni að hann verði áfram hjá Manchester United um ókomin ár.

„Um leið og ég klæddist treyjunni í fyrsta skipti vissi ég að Manchester United væri rétta félagið fyrir mig og fyrir þróun mína sem knattspyrnumaður og persóna,“ segir Ronaldo í bók sinni.

„Fjögur ár eru liðin síðan ég gekk út á völlinn á Old Trafford í fyrsta skiptið. Í dag lít ég á hann sem eitt af mínum heimilum. Ég get með sanni sagt að ég finn fyrir gríðarlegu stolti og ánægju með að vera fulltrúi þessa frábæra félags.“

Hann segist vera svo ánægður hjá Manchester United að hann geti glaður lýst því yfir að hann verði áfram hjá félaginu í mörg ár í viðbót.

Ronaldo var besti leikmaður ensku úrvalsdeildarinnar síðasta tímabilið, skoraði 23 mörk og var lykilmaður í sigri Manchester United í deildinni. Undir lok tímabilsins skrifaði hann undir samning sem skuldbindur hann við félagið til ársins 2012.

Hann er þó ekki nema 22 ára gamall og hefur ítrekaður verið orðaður við stórlið eins og Real Madrid og Barcelona.