Gyðingahatur hjá stuðningsmönnum Chelsea

Bruce Buck, stjórnarformaður Chelsea, hefur sagt frá því að félaginu hafi borist mörg bréf frá stuðningsmönnum þar sem gyðingahatur kemur fram.

„Við tökum allri uppbyggilegri gagnrýni fagnandi,“ sagði Buck. „En við höfum orðið var við gagnrýni sem felur í sér kynþáttahatur og gyðingahatur. Þessu verður að linna umsvifalaust. Þetta verður ekki liðið hvort það kemur fram í bréfaskrifum, á spjallsíðum eða í söngum stuðningsmanna. Allt slíkt kemur óorði á langstærstan meirihluta stuðningsmanna Chelsea sem vilja ekkert með slíka hegðun hafa.“

Þetta skrifaði Buck í leikskrá Chelsea sem kom út fyrir leikinn gegn Fulham á laugardaginn.

Avram Grant, nýr knattspyrnustjóri Chelsea, er Ísraeli og hefur ráðning hans valdið miklum usla hjá stuðningsmönnum Chelsea. Jose Mourinho er enn í miklu uppáhaldi hjá þeim en Grant er eftirmaður hans.