Mikil átök við moskuna helgu

Hundruð ísraelskra lögreglumanna réðust í gær til inngöngu í helgidóm múslima í Jerúsalem strax að lokinni hádegisbænastund múslima. Mikil ólga var í Palestínumönnum vegna framkvæmda á vegum Ísraela rétt utan við múrana, þar sem unnið er að fornleifarannsóknum og endurnýjun á gamalli göngubrú.

Óttast var að upp úr myndi sjóða svipað því sem gerðist eftir að Ariel Sharon, þáverandi utanríkisráðherra Ísraels, fór þangað í fylgd lögreglumanna haustið 2001.

Ísraelsku lögreglumennirnir réðust upp á hæðina helgu en fóru þó ekki inn í moskuna sjálfa, sem er þriðji helgasti staður múslima, næst á eftir Mekka og Medínu í Sádi-Arabíu.

Lögreglan beitti bæði táragasi og blossasprengjum, sem gefa frá sér mikinn hvell, til þess að koma í veg fyrir að átök brytust út í kjölfar föstudagsbænahaldsins. Til átaka kom og þurfti hjúkrunarfólk að sinna særðu fólki sem lá þar á steinstéttinni.

Um 150 palestínskir mótmælendur höfðu safnast saman inni í moskunni, en þeir fóru að tínast þaðan út eftir samningaviðræður milli lögreglumanna og fulltrúa múslima. Víða á Vesturbakkanum brutust út harðvítug mótmæli í gær vegna framkvæmdanna við helgidóminn í Jerúsalem.